Jahonning eng go‘zal ayol futbolchisi sifatida e’tirof etiladigan hurliqo Alisha Lemann yaqindagina «Yuventus» oilasiga qo‘shildi.
Bungacha Angliyada «Aston Villa» sharafini himoya qilgan Shveysariya ayollar terma jamoasi vingeri «byankonerlar» bilan 2027 yilning 30 iyunigacha mo‘ljallangan shartnomani rasmiylashtirdi. U oxirgi mavsum Birmingem klubining 17ta o‘yinida 3ta gol urgandi turli jarohatlarga qaramay.
Alisha futboldagi yo‘lini 9 yil oldin «Konolfingen» klubida boshlagan, keyin «Yang Boyz» safiga qo‘shilgan. Shveysariya Superligasida birdaniga o‘zini ko‘rsatgan va eng yaxshi to‘purarga aylangan Lemann shundan so‘ng Angliyaga yo‘l olib, «Vest Xem» bilan shartnoma tuzdi. «Everton»dagi ijara muddatidan so‘ng «Aston Villa»ga o‘tgan nozanin yarim himoyachi Birmengemda 3 mavsum to‘p surdi: jami 19ta gol va 10ta assist. Lemannning Shveysariya termasidagi faoliyatiga kelsak, u hozirga qadar o‘z mamlakati sharafini 52ta o‘yinda himoya qildi. Jumladan, ayollar o‘rtasidagi JCH-2023da qatnashdi.
To‘g‘ri, Alisha Lemannning futboldan tashqaridagi yutuqlari ancha salmoqli. Diqqat qiling, qallig‘i Duglas Luis ortidan «Aston Villa»ni «Yuventus» bilan almashtirgan xonim birgina «Instagram» ijtimoiy tarmog‘ida 16,8 million obunachiga ega. «Yuventus»ning yangi futbolchisi bu borada «A» seriyaning barcha top-klublaridan oldinda! Kutilishicha, Alisha yangi mavsumda nafaqat Turin klubi, balki butun Italiya chempionatining alohida chiroyiga aylanadi.
Alisha Lemann va «A» seriya yetakchi klublarining «Instagram»dagi
obunachilari soni
Alisha Lemann - 16,8 million
«Milan» - 16,3 million
«Inter» — 11,7 million
«Roma» - 7,3 million
«Napoli» - 4,7 million
