Kanada Olimpiya qo‘mitasi Fransiyadagi Yangi Zelandiya ayollar futbol terma jamoasi mashg‘ulotlari ustida uchgan dron haqida bayonot berdi. Olimpiada turnirining "A" guruhida Kanada va Yangi Zelandiya ayollar terma jamoalari bahs olib boradi.
"Kanada Olimpiya qo‘mitasiga ma’lum qilinishicha, 22 iyul kuni Fransiya hukumati Yangi Zelandiya terma jamoasining shikoyatidan so‘ng Sent-Etenda Kanada ayollar futbol jamoasining akkreditasiyadan o‘tmagan a’zosini hibsga olgan. Xodim Yangi Zelandiya ayollar terma jamoasi mashg‘ulotlarini yozib olish uchun drondan foydalangani taxmin qilinmoqda.
Kanada Olimpiya qo‘mitasi halol o‘yin tarafdori va biz hayratda va hafsalamiz pir bo‘ldi. Biz Yangi Zelandiya futboli, jabrlangan barcha futbolchilar va Yangi Zelandiya Olimpiya qo‘mitasidan samimiy uzr so‘raymiz.
Biz XOQ, Parij-2024 tashkiliy qo‘mitasi, Kanada futbol assosiasiyasi va FIFA bilan keyingi qadamlarni muhokama qilmoqdamiz", — deyiladi Kanada Olimpiya qo‘mitasi rasmiy saytida.
