"Real" yangi mavsumga tayyorgarlikni shu hafta oxirida boshlaydi, ammo chorshanba kuni kechqurun yopiq eshiklar ortidagi o‘rtoqlik uchrashuvini o‘tkazdi va Ispaniya ikkinchi divizioni "Albasete" jamoasini 3:0 hisobida mag‘lub etdi. Madridliklar yaqin kunlarda AQSHga yo‘l oladi, biroq bir qator asosiy futbolchilar Amerika yig‘inida ishtirok etmaydi.
Fransiya Yevro-2024 yarim finaliga chiqqanidan keyin Mbappe Madriddagi debyutini o‘tkaza olmaydi, turnir finalchisi Bellingemga ham dam olish uchun qo‘shimcha vaqt beriladi. The Athletic nashri xabariga ko‘ra, ikkala futbolchi ham avgust oyi o‘rtalarida Yevropa Ligasi sohibi "Atalanta"ga qarshi UYEFA Superkubogi uchun o‘yinda maydonga qaytishi kerak.
Mbappe va Bellingemdan tashqari Dani Karvaxal, Ferlan Mendi, Aureliyen Tchuameni, Eduardo Kamavinga va Federiko Valverde ham uzoq muddatli o‘yinlar tufayli jamoaning AQSHdagi turnesini o‘tkazib yuborishi kutilmoqda. Biroq Eder Militao va Rodrigo bilan birga Braziliya terma jamoasi safida Amerika Kubogida muvaffaqiyatsizlikka uchragan Endrik va Vinisius Junior "Milan", "Barselona" va "Chelsi"ga qarshi o‘rtoqlik o‘yinlarida ishtirok etadi.
Bir qator o‘yinchilar yo‘qligi sababli, tarkib ancha yosh bo‘lishi mumkin. O‘tgan yilgi muvaffaqiyatdan so‘ng madridliklar yana qizg‘in mavsumni kutmoqda.
Karlo Anchelotti shogirdlari Ispaniya chempionatini hafta oxirida Superkubokdan keyin boshlaydi, shuningdek, 2024/25 yilgi mavsumda Ispaniya kubogi, Ispaniya Superkubogi, FIFA qit’alararo kubogi va FIFA klublar o‘rtasidagi jahon chempionatida ishtirok etadi.
O‘yinchilarning yukning ortib borayotgani tashvish uyg‘otmoqda, Yevropa ligalari va futbolchilar xalqaro o‘yinlar taqvimidagi tirbandlik va tartibsizliklar tufayli FIFAga qarshi sud choralarini ko‘rishni rejalashtirmoqda. Madridliklar o‘tgan mavsumda jarohatlar bilan bog‘liq muammolarga duch kelishdi, Tibo Kurtua, David Alaba va Militaolar jarohat olishdi.
