Yozgi Olimpiya o‘yinlarida medallar uchun kurashayotgan mamlakatlar orasida AQSH va Xitoy sportchilarining kurashi so‘nggi kungacha davom etishi tobora oydinlashib bormoqda.

Bugungacha o‘tgan musobaqalar sarhisobiga ko‘ra, davlatlar jadvalini AQSH sportchilari 33 ta oltin, 39 ta kumush, 39 ta bronza, jami 111 ta medal bilan boshqarib kelayotgan bo‘lsa, Xitoy olimpiyachilari 33 ta oltin, 27 ta kumush, 23 ta bronza, jami 83 ta medal bilan okean orti vakillarini ta’qib etmoqda.

Ko‘rinib turibdiki, oltin medallar jamg‘arishda har ikki mamlakat teng kuchga ega, faqat umumiy medallar sonida amerikaliklar 28 ta medal farqi bilan oldinda bormoqda.

Har qanday musobaqada son emas, sifat, ya’ni oltin medallar yetakchi davlatni aniqlashda asosiy omil.

So‘nggi ikki kunlik Olimpiya o‘yinlari dasturidan o‘rin olgan stol tennisi, taekvondo, og‘ir atletika kabi sport turlarida chin yurti vakillari oltin medallarga da’vogarlik qilayotgani, AQSH vakillari ayollar futboli, basketbol kabi sport turlarida, shuningdek erkin kurash, taekvondoning ayrim vaznlarida kuchlilar qatoridan joy olishga harakat qilishi inobatga olinsa, o‘yinlarning so‘nggi kuniga qadar qaysi biri “Parij-2024”ni yetakchi davlat sifatida yakunlashini bashorat qilish qiyin.

Bevosita O‘zbekiston sportchilarining bu galgi Olimpiya o‘yinlarida shov-shuvli tarzda kuchli o‘nlik ro‘yxatiga yaqinlashayotgani har jihatdan e’tirofga loyiq, deyish mumkin.

Mamlakatimiz sportchilari hozirda 5 ta oltin, 3ta bronza medali bilan 14-o‘rinda bormoqda.

Ushbu natija bugun o‘tadigan taekvondo, boks, erkin kurash, og‘ir atletika kabi sport turlaridagi ko‘rsatkichlar natijasida yanada yaxshilanishi, mamlakatimiz sportchilari 11-13-o‘rinda borayotgan Kanada, Yangi Zelandiya, Vengriya, hatto 10-o‘rinda borayotgan Italiya jamoasini ham ortda qoldirish imkoniyatiga ega bo‘lishi mumkin.