Superligada 15-tur bahslari davom ettirildi. Turning markaziy uchrashuvi esa Qarshida kechdi. Unda «Nasaf» «Paxtakor»dan minimal hisobda ustun keldi. Bellashuvdan so‘ng mezbonlar bosh murabbiyi Ro‘ziqul Berdiyev matbuot anjumanida ishtirok etdi.

— Muxlislarni xursand qilishni juda ham xohlagan edik. Ularni tabriklaymiz. Yigitlar mehnat qilishdi. «Paxtakor» 5-4-1 sxemasida o‘ynashini kutmagan edik. Birinchi bo‘limda vaziyat deyarli bo‘lmadi. Ikkinchi taymda gol kiritgach, natija uchun o‘ynadik va hisobni saqlab qoldik.

— «Nasaf»ning yorqin o‘yiniga o‘rganib qolgan ekanmiz. Bugun kutilganidek ko‘rinmadi jamoa?!

— Ko‘p narsalar bahsga ta’sir qildi. O‘yin amaliyoti yo‘qligi sezildi. Bizga qarshi maydonga tushgan raqiblarning hammasi asosan himoyada turgani bois, bo‘sh zonalar deyarli bo‘lmaydi. Raqibning tanlagan taktikasi o‘z o‘yinimizni ko‘rsatgani bermadi. Asosiysi natija edi. Hammani g‘alaba bilan tabriklayman.

— Bugungi uchrashuvni 6 ochko uchun deb ayta olasizmi?

— Albatta. «Paxtakor»ni hisobdan chiqarib bo‘lmaydi. Ular yaxshi ijrochilarni safiga qoshib oldi. Bu 6 ochkolik bahsga yaqin edi.

— Yangi kelganlarning harakatlari haqida nima deya olasiz?

— Biz bemalol Stefanga imkon berdik. U jismonan bahsga tayyor edi. Valentin hali formasini tiklay olganicha yo‘q. U ikki oyda ikkita bellashuv o‘tkazgan xolos. Oldinda o‘yinlarimiz juda ko‘p. Hali OCHL-2 bahslarida ishtirok etamiz.

— Marko Stanoyevichni murabbiylar shtabida ko‘rish variantini ko‘rib chiqdingizmi?

— U bilan hazillashib turamiz, tugatganindan so‘ng klubda olib qolamiz, seleksioner bo‘lib ishlaysan deb. U doim kuladi bu so‘larni eshitganda. Afsuski, 35 yoshda jarohatdan forig‘ bo‘lib maydonga qaytishi katta voqea. Uning futbol tushunchasi yaxshi. Yigitlar bilan muomilasi, 2-3 ta tilni yaxshi bilishi ham foyda beradi. Buni albatta o‘ylab ko‘ramiz.

— Ikkinchi davraga tayyorgarlik paytida asosiy urg‘u nimaga berildi?

— Ko‘proq tiklanishga. Vaqt kam bo‘lsa, yuklamalarni ko‘paytirib bo‘lmaydi. Mana bunday payta og‘irlik his qilishimiz mumkin. Ikkita tarkibimiz borligi sababli rotasiyaga murojaat etyapmiz. Bugungi raqib bilan oson bo‘lmasligi aniq edi. Uni ko‘rmay o‘tib keta olmaymiz. Bu yerda iqtidorli futbolchilar ko‘p.