«Chelsi» yarim himoyachisi Konor Gallaxer nihoyat Madridning «Atletiko» klubi futbolchisiga aylanadi.
«Matraschilar» taxminan ikki hafta oldin ingliz futbolchisi bilan shartnoma imzolaganini e’lon qilishlari mumkin edi, ammo Samuel Omorodionning «Chelsi»ga o‘tishi muvaffaqiyatsizlikka uchragani uchun kelishuv kechiktirilishiga to‘g‘ri keldi. Endi klublar yana kelishishga muvaffaq bo‘lishdi: Gallaxer chorshanba kuni «Atletiko»ning yangi transferi sifatida tanishtirilishi kutilmoqda, Joau Feliks esa teskari yo‘nalish tomon yo‘l oladi.
"Esto Es Atleti" xabariga ko‘ra, londonliklarning 24 yoshli tarbiyalanuvchisi allaqachon Madridga kelib qo‘ndi. Yarim himoyachi «Atletiko» muxlislariga dastxat berayotganda: «Ertaga barchangizni stadionda ko‘rishni intiqlik bilan kutaman», dedi.
