Bugun, 22 avgust kuni AQSHning Sent-Luis shahrida shaxmat bo‘yicha davom etayotgan "Sinquefield Cup-2024" turnirining 4-turi doirasida hamyurtimiz Nodirbek Abdusattorov qora donalarda Fransiya vakili Maksim VashYE-Lagrav bilan kuch sinashadi.
“Grand Chess Tour” musobaqasining beshinchi bosqichi bo‘lgan ushbu turnirning kecha yakunlangan 3-tur o‘yinlarida musobaqada yetakchilik qilayotgan Alireza Firuzja oq donalarda Maksim VashYE-Lagrav bilan murosa yo‘lini tanladi.
Uchinchi turning qolgan ikkita “dueli”da ham durang qayd etilgan bo‘lsa, Abdusattorov musobaqaning birinchi raqamli ishtirokchisi, jahon reytingida 3-o‘rinda borayotgan amerikalik Fabiano Karuanaga imkoniyatni boy berdi.
4-tur ostonasida "Sinquefield Cup-2024" turnirida Yan Nepomnyashiy va Alireza Firuzja 2 ochkoga ega bo‘lgan holda peshqadamlik qilayotgan bo‘lsa, 6 nafar grossmeyster 1,5 ochko bilan keyingi pog‘onalarni band etgan.
Nodirbek Abdusattorov va niderlandiyalik Anish Giri esa hozircha 1 ochkoga ega bo‘lib turibdi.
Eslatib o‘tamiz, mukofot jamg‘armasi 350 ming AQSH dollardan iborat turnirda g‘oliblikka erishgan shaxmatchi 100 ming AQSH dollari bilan taqdirlanadi.
