Бугун, 22 август куни АҚШнинг Сент-Луис шаҳрида шахмат бўйича давом этаётган "Sinquefield Cup-2024" турнирининг 4-тури доирасида ҳамюртимиз Нодирбек Абдусатторов қора доналарда Франция вакили Максим Вашье-Лаграв билан куч синашади.
“Grand Chess Tour” мусобақасининг бешинчи босқичи бўлган ушбу турнирнинг кеча якунланган 3-тур ўйинларида мусобақада етакчилик қилаётган Алиреза Фирузжа оқ доналарда Максим Вашье-Лаграв билан муроса йўлини танлади.
Учинчи турнинг қолган иккита “дуэли”да ҳам дуранг қайд этилган бўлса, Абдусатторов мусобақанинг биринчи рақамли иштирокчиси, жаҳон рейтингида 3-ўринда бораётган америкалик Фабиано Каруанага имкониятни бой берди.
4-тур остонасида "Sinquefield Cup-2024" турнирида Ян Непомняший ва Алиреза Фирузжа 2 очкога эга бўлган ҳолда пешқадамлик қилаётган бўлса, 6 нафар гроссмейстер 1,5 очко билан кейинги поғоналарни банд этган.
Нодирбек Абдусатторов ва нидерландиялик Аниш Гири эса ҳозирча 1 очкога эга бўлиб турибди.
Эслатиб ўтамиз, мукофот жамғармаси 350 минг АҚШ доллардан иборат турнирда ғолибликка эришган шахматчи 100 минг АҚШ доллари билан тақдирланади.
