«Metallurg» - «Dinamo» (0:1) o‘yinidan keyingi matbuot anjumanida Vadim Abramov uchrashuvdan bir kun avval reglamentda belgilanganiga qaramay, Olmaliqdagi ushbu stadionda mashg‘ulot o‘tkazish uchun ruxsat berilmagani borasida ham fikrini bildirdi. Jamoa boshqa maydonda mashg‘ulot o‘tkazishga majbur bo‘lgan.
- O‘yindan bir kun avval «Dinamo»ga ushbu maydonda mashg‘ulot o‘tkazishga ruxsat berilmagani bugungi uchrashuvga qay daraja ta’sir qildi?
- Bu holat avvalo, bizga nisbatan chiroyli munosabat emas. Negadir biz bilan shunday ishlar kuzatilyapti. Avvalgi safar o‘yinida «Neftchi» bilan bahs oldidan Farg‘onada mashg‘ulot o‘tashimiz uchun maydon chimi o‘rilmagan, yomon holatda edi. Endi esa o‘yindan bir kun avval uchrashuv o‘tadigan maydonga mashg‘ulot o‘tkazishga qo‘yishmadi. Reglament bor, ammo negadir uni boshqalar buza olayapti... Ochig‘i, bilmadim, bu savol menga bo‘lmasa kerak, shunchaki bu chiroyli holat emas.
