Xabar berganimizdek, kechagi kun ham o‘zbekistonlik paralimpiyachilar uchun omadli keldi. Bugungi kun oldidan O‘zbekiston sport delegasiyasi 5 ta oltin, 3 ta kumush, 3 ta bronza medali bilan umumjamoa hisobida 7-o‘rinni egallab turibdi.
Bu bilan biz Fransiyadan o‘zib ketdik. Kecha Fransiya 7-o‘rinni band etgandi. Paralimpiya mezbonlari hisobida 3 ta oltin, 6 ta kumush, 8 ta bronza medali bor.
Xitoy Respublikasi 20 ta oltin, 15 ta kumush, 7 ta bronza, jami 42 ta medal bilan ro‘yxatda peshqadamlik qilyapti. Chin yurti vakillari kechagi bahslarda 8 ta oltin medal qo‘lga kiritishdi. O‘n bitta oltin, 8 ta kumush, 6 ta bronza medaliga ega Buyuk Britaniya ikkinchi o‘rinni egallab turgan bo‘lsa, Braziliya delegasiyasi 8 ta oltin, 3 ta kumush, 12 ta bronza medali bilan kuchli uchlikka yakun yasagan.
