"Barselona" himoya va yarim himoya chizig‘ini kuchaytirish niyatida va shuning uchun "Bayer"ning markaziy himoyachisi Jonatan Ta va "Bavariya"ning tayanch yarim himoyachisi Yozua Kimmix bilan shartnoma imzolashga tayyor. Bu haqda Mundo Deportivo xabar bermoqda.

Manbaga ko‘ra, "ko‘k-anorranglilar" bu futbolchilarni 2025 yilning yozida, ya’ni klublar bilan shartnomalari tugaydigan vaqtda sotib olmoqchi.

Ta’kidlanishicha, "Barselona" o‘z niyatini Taning agentiga allaqachon bildirgan. Bundan tashqari, Kataloniya klubi bosh murabbiyi Xans-Diter Flik o‘zi "Bavariya"da birga ishlagan Kimmixning jamoaga kelishini kutmoqda.

Joriy mavsumda Ta barcha turnirlarda to‘rtta o‘yinda qatnashib, foydali harakatlarni amalga oshira olmadi.

Transfermarkt portalida berilgan ma’lumotlarga ko‘ra, futbolchining bozor qiymati 30 million yevroni tashkil qiladi.