«Qarimas» Jeyms Milner APLning yangi mavsumiga rekord ko‘rsatkichni «urish» bilan qadam tashladi.

Ayni payt «Brayton» sharafini himoya qilayotgan 38 yoshli yarim himoyachi Angliya elit ligasida naq 23-mavsumni boshladi. Qo‘shimchasiga uning hisobida 12ta sovrin ham bor!

Jeyms Milner APLdagi mavsumlar soni bo‘yicha uelslik afsona Rayan Giggzdan o‘zib ketdi. Futbolchilik faoliyatiga 2014 yili nuqta qo‘ygan «MYU»ning sobiq yarim himoyachisi Angliya Premer-ligasida naq 22 mavsum o‘ynagandi. To‘g‘ri, u sovrinlar soni bo‘yicha Milnerdan ancha oldinda. 50 yoshni urib qo‘ygan Uels futboli vakili faoliyati davomida naq 34ta kubok to‘plagan. Jeyms Milnerga kelsak, 38 yoshli angliyalik hisobida 12ta sov-rin bor. Butun faoliyatida faqat Angliya chempionatida to‘p surgan «temir» Milner 23 mavsum davomida 634ta o‘yin to‘plagani bilan ham maqtanishga haqli. Mavsumlar soni bo‘yicha uchinchi yuqori natija yana bir yarim himoyachi Garet Barriga tegishli. 2020 yili butsalarini mixga ilgan sobiq futbolchi APLda 21 mavsum o‘ynadi. E’tiborlisi, u butun faoliyatini 2ta klub - «Aston Villa» va «Manchester Siti»ga bag‘ishladi. To‘g‘ri, Garet sovrinlari soni bo‘yicha uncha maqtanolmaydi - 21 mavsumda atigi 4ta kubok.