Qirg‘iziston terma jamoasi bosh murabbiyi Maksim Lisisin O‘zbekistonga qarshi bo‘ladigan o‘yin arafasida matbuot anjumanida ishtirok etdi.

"Tayyorgarlik reja bo‘yicha ketmoqda. Afsuski, futbolimizda katta tanaffus yuzaga keldi. Yigitlar O‘zbekistonga qarshi o‘yinga maksimal darajada tayyor bo‘lishi uchun harakat qilyapmiz. Jamoani tubdan o‘zgartirish uchun vaqtimiz ko‘p emasdi. Shunga qaramay, raqibni o‘rganishga ulgurdik. Bizda vaziyatlar bo‘ladi va bu orqali raqibni hayron qoldiramiz.

Maydonda hamisha ikkita jamoa bo‘ladi, bitta emas. Biz uchun qulay bo‘lgan variantni topishimiz kerak. Har bir futbolchining maydondagi vazifasi bo‘ladi. O‘yinchilar o‘zlarining kuchli jihatlaridan foydalanishlari talab etiladi. Futbolchilarimiz taktik rejani muvaffaqiyatli amalga oshirishmoqda.

Yosh o‘yinchilarga to‘xtaladigan bo‘lsam, ayni paytda ular yetarlicha jalb etildi. Bundan keyin ham tarkibni yoshartirishda davom etishni rejalashtiryapmiz. Bu jarayon bosqichma-bosqich amalga oshiriladi", — dedi Lisisin.