"Yuventus" yarim himoyachisi Artur Melo yaqin vaqt ichida jamoani tark etishi mumkin.
Braziliyalik futbolchi "Byankonerilar"ning yangi bosh murabbiyi Tiago Motta rejalariga kiritilmagan - futbolchi joriy mavsumda birorta o‘yinda, jumladan, mavsumoldi uchrashuvlarida ham tarkibga kiritilmadi. Insayder Fabrisio Romanoning so‘zlariga ko‘ra, "Yuventus" bunday imkoniyat mavjud bo‘lgan paytda Arturni boshqa klubga qo‘yib yuborishga tayyor. Turkiyada transfer oynasi ochiq, bundan Mottaning rejalariga kirmagan Filip Kostich ham yaqinda foydalandi - serb "Fenerbaxche"ga ko‘chib o‘tdi.
Shu bilan birga, manbaga ko‘ra, Artur bo‘yicha taklif tushmasa, "Yuventus" uni qishki transfer oynasi ochilgunga qadar tarkibga qaytarishi mumkin. 28 yoshli yarim himoyachi Chempionlar ligasi o‘yinlarida ishtirok etishi mumkin bo‘lgan futbolchilar ro‘yxatiga kiritildi.
