O‘zbekistonlik professional bokschi yarim o‘rta vazn toifasida WBA kamari uchun majburiy da’vogar, Olimpiada kumush medali sohibi Shahram G‘iyosov hozirgi kunda O‘zbekistondagi eng kuchli bokschilarni sanab o‘tdi.

“Uch nafar bokschini sanashim kerakmi?”, — deydi Shahram Fazliddin G‘oyibnazarovning savoliga javoban. “Hasanboy Do‘stmatov, Abdumalik Halokov. Murodjon hozir chetda, uni xursand qilib qo‘yaylik, Murodjon Ahmadaliyev uchinchisi.

Nima? U O‘zbekistondami? Kelganini ham aytmaydi, unda uchinchisi Bahodir (Jalolov). Hammalarini yaxshi ko‘raman, lekin bu yerda uch kishini sanash kerak ekan”.

Eslatib o‘tamiz, Shahram G‘iyosov 1 avgust sanasida so‘nggi jangini o‘tkazgan edi. Los-Anjelesda bo‘lib o‘tgan boks oqshomida Shahram Migel Perrani ochkolar hisobiga mag‘lub etgandi.