Budapeshtdagi shaxmat olimpiadasida 8-tur o‘yinlari o‘tkazildi. O‘zbekiston erkaklar terma jamoasi Serbiyaga qarshi o‘yinda, kutilmaganda, juda va juda qiyin o‘yinlarni o‘tkazdi.

Serblar barcha taxtalarda ochiqchasiga durang uchun o‘ynashdi. Ular Nodirbek Yoqubboyev, Javohir Sindarov va Shamsiddin Vohidovga qarshi bahslarda durangga erishishdi.

Nodirbek Abdusattorov esa qoralarda o‘ynaganiga qaramay, raqib uchun kutilmagan debyut yo‘nalishini tanladi. Buning oqibatida Aleksandr Predke yurishlar uchun ko‘p vaqt sarflay boshladi. 15-yurishga kelib raqib hisobida bor-yo‘g‘i 14 daqiqa vaqt qolgandi. Shuning oqibatida bo‘lsa kerak, u aynan 15-yurishda xatoga yo‘l qo‘ydi. Natijada ustunlik o‘zbek shaxmatchisi tomoniga o‘tdi. Predke 35-yurishda yana bir xatoga yo‘l qo‘ygach, Abdusattorovning ustunligi yana oshdi. Bu ustunlik 43-yurishgacha oshib bordi va g‘alaba yaqin edi. Ammo hamyurtimiz 44, 45 va 46-yurishlarda noaniqlikka yo‘l qo‘yishi oqibatida vaziyat tenglashib qoldi.

Shundan so‘ng o‘zbekistonlik grossmeyster barchasini boshqatdan boshlashiga to‘g‘ri keldi. Bu paytda shaxmat doskasida figuralar kam qolgandi. Tomonlar ruhli endshpilga o‘tishdi va Abdusattorov bitta piyoda ustunligiga ega edi. Ammo buni g‘alabaga aylantirish oson emasdi. Buning uchun Predkedan qo‘pol xato talab etilardi. Aleksandr kuchli seytnotga kirib qolishi ortidan 65-yurishda o‘sha xatoni qildi. Nodirbek esa o‘sha zahoti bu xatodan unumli foydalandi. 70-yurishda serbiyalik shaxmatchi taslim bo‘ldi.

Yakuniy hisob — 2,5 - 1,5. O‘zbekiston foydasiga.

Ushbu g‘alaba tufayli erkaklar terma jamoamizning ochkolari 14 taga yetdi va jamoamiz jadvalda 2-o‘ringa ko‘tarilib oldi. Ertaga ko‘p ehtimol bilan Hindistonga qarshi dona suramiz.

O‘zbekiston ayollar terma jamoasi esa bugun kuchli raqib — AQSHga 0,5 - 3,5 hisobida imkoniyatni boy berdi.