Butunjahon shaxmat olimpiadasida bugun 10-tur o‘yinlari o‘tkazildi.

Erkaklar o‘rtasidagi O‘zbekiston va Xitoy terma jamoalari o‘rtasidagi bahslar og‘ir o‘tdi va drama janriga mos bo‘ldi. Nodirbek Abdusattorov amaldagi jahon chempioni Ding Lirenga qarshi bahs o‘rtalarida bir qator xatolarga yo‘l qo‘ydi. Natijada Ding g‘alabaga yaqin edi, ammo hamyurtimiz durangga qochishni uddaladi.

Ikkinchi taxtada Nodirbek Yoqubboyev xitoylik shaxmat ustasi Vey Yiga qarshi dona surdi. Raqib o‘yin o‘rtalarida  sipoh qurbon qilib, ustunlikka erishdi. Ammo o‘yin o‘rtasidan o‘tganida u ham xato qila boshladi. Afsuski, Yoqubboyev bu xatolardan foydalana olmadi va mag‘lub bo‘ldi.

Uchinchi taxtada Javohir Sindarov o‘yin o‘rtalarida kichik ustunlikka erishib turganiga qaramay, Shohni biroz noaniq katakka yurib qo‘ydi. Yu Yangyi bu xatoni kechirmadi va mag‘lubiyatga uchradi.

Shamsiddin Vohidov to‘rtinchi taxtada mardonavor kurashib, g‘alabaga erishdi. Yakuniy hisob — 1,5 - 2,5.

O‘zbekiston erkaklar terma jamoasi ertaga g‘alabaga erishishga va Olimpiadani kuchli uchlikda yakunlashga harakat qiladi.

O‘zbekiston ayollar terma jamoasi esa, kutilmaganda, Angliya ustidan ishonchli g‘alabaga erishdi — 3:1. Umida Omonova va Nodira Nodirjonova g‘alaba qozongan bo‘lsa, Afruza Hamdamova va Nilufar Yoqubboyeva durang qayd etishdi.

Erkaklar terma jamoamiz

O‘ZBEKISTON - XITOY - 1,5:2,5. Mag‘lubiyat...
Nodirbek Abdusattorov (2766)  - Ding Liren (2736) - 0,5:0,5
Nodirbek Yoqubboyev (2666) - Vey Yi (2762) - 0:1
Javohir Sindarov (2677) - Yu Yangyi (2703) - 0:1
Shamsiddin Vohidov (2650)  - Vang YuYE (2637) - 1:0

Ayollar terma jamoamiz

O‘ZBEKISTON - ANGLIYA - 3:1. G‘alaba!
Afruza Hamdamova (2313) - Lao Lan (2353) - 0,5:0,5
Nilufar Yoqubboyeva (2248) - Yovanka Xouska (2333) - 0,5:0,5
Umida Omonova (2032) - Toma Katarzina (2184) - 1:0
Nodira Nodirjonova (2059) - Bodxana Sivanandan (2196) - 1:0