Superliganing 19-turidan o‘rin olgan “Metallurg” — “Paxtakor” (3:2) uchrashuvidan so‘ng mezbonlar bosh murabbiyi Grigoriy Kolosovskiy matbuot anjumanida ishtirok etdi.

O‘yin haqida

— Albatta “Paxtakor”ga qarshi o‘yinlar oson o‘tmaydi. Birinchi bo‘lim gol o‘tkazib yubordik va bu bizga qator qiyinchiliklarni olib keldi. Ikkinchi bo‘limda faollikni oshirdik. Bilasizmi, biz bu o‘yinga murabbiylar shtabi, rahbariyat bilan juda puxta hozirlik ko‘rgandik. Ishlab chiqqan rejalarimiz ish berganidan xursandmiz. O‘yinni nazorat qilishga intildik. G‘alaba golimiz ham chiroyli, ham muhim bo‘ldi. Qiyin o‘yin, raqibdan kelib chiqsak, bu avvaldan ma’lum edi. G‘alaba bizga navbatdagi o‘yinlar oldidan qo‘shimcha ishtiyoq taqdim etsa, ajab emas.

— Bugungi o‘yinga tanlangan uslub keyingi uchrashuvlarda ham qo‘llaniladimi?

— Ish bergan uslublarni albatta amaliyotga joriy qilamiz. Biz har bir raqibning o‘yinidan kelib chiqib taktika tanlaymiz. “Olimpik”ka qarshi uchrashuvda so‘nggi daqiqalarda yutqni qo‘ldan boy bergandik. Bugun esa birinchi bo‘lib gol o‘tkazib yuborgan bo‘lsakda, taslim bo‘lmadik. Ikkinchi bo‘limda faollikni oshirdik. 4 ta qulay imkoniyatga ega bo‘ldik. Bugungi o‘yindan olgan yana bir xulosa, kim asosiy tarkibga munosib, kim zaxirada qolishi kerak, buni ham aniqlab oldik. Zaxiradan tushib ham jamoaga katta foyda keltiradigan futbolchilar bo‘ladi. Hammasini to‘g‘ri tanlash lozim. Biz esa ixtiyorimizdagi bor futbolchilardan foydalanamiz.

— Avvalgi uchrashuvda ham jamoa so‘ngi daqiqalarda gol o‘tkazib yuborgandi. Bugun ham shunday bo‘ldi. Kelgusida buning oldini olish uchun qanday rejalaringiz bor?

— Xatolar ustida ishlaymiz. Ishtiyoqni yanada oshirish uchun harakat qilamiz. So‘nggi daqiqalarda gol o‘tkazib yuborish bu – yakuniy natijaning salbiy ko‘rinishiga sabab bo‘ladi. Biz har doim g‘alabani hohlaymiz. Ketma-ket 4 ta o‘yinda biz g‘alabaga haqli o‘yin namoyish etgandik.

— Ivan Yosovich so‘ngi o‘yinlarda ko‘rinmayotganiga izoh bersangiz?

— Yosovich jarohatidan davolash amaliyotini olib borayapti. Uning bu yil maydonga qaytishiga ishonch yo‘q. Barchasi uning qanchalik tez tiklanishiga bog‘liq.