Суперлиганинг 19-туридан ўрин олган “Металлург” — “Пахтакор” (3:2) учрашувидан сўнг мезбонлар бош мураббийи Григорий Колосовский матбуот анжуманида иштирок этди.

Ўйин ҳақида

— Албатта “Пахтакор”га қарши ўйинлар осон ўтмайди. Биринчи бўлим гол ўтказиб юбордик ва бу бизга қатор қийинчиликларни олиб келди. Иккинчи бўлимда фаолликни оширдик. Биласизми, биз бу ўйинга мураббийлар штаби, раҳбарият билан жуда пухта ҳозирлик кўргандик. Ишлаб чиққан режаларимиз иш берганидан хурсандмиз. Ўйинни назорат қилишга интилдик. Ғалаба голимиз ҳам чиройли, ҳам муҳим бўлди. Қийин ўйин, рақибдан келиб чиқсак, бу аввалдан маълум эди. Ғалаба бизга навбатдаги ўйинлар олдидан қўшимча иштиёқ тақдим этса, ажаб эмас.

— Бугунги ўйинга танланган услуб кейинги учрашувларда ҳам қўлланиладими?

— Иш берган услубларни албатта амалиётга жорий қиламиз. Биз ҳар бир рақибнинг ўйинидан келиб чиқиб тактика танлаймиз. “Олимпик”ка қарши учрашувда сўнгги дақиқаларда ютқни қўлдан бой бергандик. Бугун эса биринчи бўлиб гол ўтказиб юборган бўлсакда, таслим бўлмадик. Иккинчи бўлимда фаолликни оширдик. 4 та қулай имкониятга эга бўлдик. Бугунги ўйиндан олган яна бир хулоса, ким асосий таркибга муносиб, ким захирада қолиши керак, буни ҳам аниқлаб олдик. Захирадан тушиб ҳам жамоага катта фойда келтирадиган футболчилар бўлади. Ҳаммасини тўғри танлаш лозим. Биз эса ихтиёримиздаги бор футболчилардан фойдаланамиз.

— Аввалги учрашувда ҳам жамоа сўнги дақиқаларда гол ўтказиб юборганди. Бугун ҳам шундай бўлди. Келгусида бунинг олдини олиш учун қандай режаларингиз бор?

— Хатолар устида ишлаймиз. Иштиёқни янада ошириш учун ҳаракат қиламиз. Сўнгги дақиқаларда гол ўтказиб юбориш бу – якуний натижанинг салбий кўринишига сабаб бўлади. Биз ҳар доим ғалабани ҳоҳлаймиз. Кетма-кет 4 та ўйинда биз ғалабага ҳақли ўйин намойиш этгандик.

— Иван Йосович сўнги ўйинларда кўринмаётганига изоҳ берсангиз?

— Йосович жароҳатидан даволаш амалиётини олиб бораяпти. Унинг бу йил майдонга қайтишига ишонч йўқ. Барчаси унинг қанчалик тез тикланишига боғлиқ.