Italiya terma jamoasi yetakchilaridan biri Federiko Kyeza 29 avgust kuni «Liverpul» bilan birdagina 4 yillik shartnoma tuzdi.
Tabiiyki, 26 yoshli yarim himoyachi «qizillar» safiga qo‘shilganidan keyin klub kanalida mehmon bo‘ldi va muhtasham «Enfild»ga alohida to‘xtaldi. Darvoqe, «Yuventus» Federikodek yuqori darajali futbolchini atigi 12,5 million funtga qo‘yib yuborish asnosida ko‘plab muxlislar va mutaxassislarni biroz hayron qoldirganini ham aytish kerak.
- Federiko, ilk taassurotlar qanday?
- Ajoyib kun! «Liverpul» oilasi a’zzosiga aylanganimdan xursandman. Richard Xyuz va Arne Slot telefon orqali jamoaga chorlashganida, ikkilanmay rozilik berdim. Chunki «Liverpul» tarixidan xabardorman, klub muxlislar uchun nimani anglatishini ham yaxshi bilaman. Xullas, hozir o‘ta baxtiyorman va ishga kirishish onlarini sabrsizlik bilan kutyapman.
- Ha, hammasi juda tez hal etildi. Demak, qaror qabul qilishda qiynalmagansiz...
- Shunday, hammasi oson bo‘ldi. Taklifni qabul qilish uchun sabablar yetarli edi. Qolaversa, o‘zaro suhbatda Xyuz va Slotning menga qattiq ishonishlari sezildi. Ishonch esa aynan men xohlagan narsa! «Enfild»da bo‘lish chindan ham ajoyib. Axir «Liverpul» va dunyodagi eng zo‘r chempionatda o‘ynash orzum amalga oshdi.
- So‘nggi kunlar siz va turmush o‘rtog‘ingiz uchun qanday o‘tdi?
- Hammamiz xursandmiz. Yaxshiki, qaror chiqarishda ikkilanmadik, har bir daqiqadan zavqlandik. To‘g‘ri, hali oilam bilan barchasi haqida bafurja gaplashib olishim kerak. Turmush o‘rtog‘imdan bag‘oyat minnatdorman, chunki «Liverpul» haqida so‘z ochishim bilan u tanlovimni qo‘llab-quvvatladi: «Zo‘r qaror, albatta, sen bilan ketaman. Bu faoliyating va oilamiz uchun ajoyib imkoniyatdir».
- Mashg‘ulotlar bazasi yoqdimi?
- Bu yerda hammasi zo‘r, odamlar ajoyib! Kirkbida ko‘plab testlardan muvaffaqiyatli o‘tdim. Aytgancha, Liverpulga parvoz chog‘i «Enfild» ustidan uchib o‘tdik. Shunda rafiqamga so‘z qotdim: «You`ll Never Walk Alone qo‘shig‘ini qo‘y, hozirdan ushbu stadionda muxlislar shovqini ostida o‘ynashni tasavvur qilmoqchiman».
- «Enfild» maydoniga birinchi marta qadam bosishni qanday tasavvur qilyapsiz?
- Nafaqat o‘zim, balki oilam uchun hissiyotli lahza bo‘lishi aniq. Ishonchim komil, hayajon ming chandon ortib ketadi.
- Arne Slot ilk uchrashuvda nima dedi?
- Shunchaki, jamoada yo‘lga qo‘yilayotgan o‘yin chizmasi haqida ma’lumot berdi va meni maydonda qanday ko‘rishni istashi haqida gapirdi.
- Jamoaning hujum chizig‘ida kuchli raqobat bor...
- Nafaqat hujum, barcha pozisiyalarda raqobat bor, axir gap dunyodagi eng kuchli klublardan biri haqida ketmoqda. Ha, meni katta raqobat kutayotganini bilaman - Mo Saloh, Luis Dias, Kodi Gakpo, Diogu Jota, Darvin Nunyes... Demak, eng yaxshi sifatlarimni ishga solishim va bor imkoniyatlarimdan foydalanishim talab etiladi.
- 14-raqamni tanladingiz, bu qandaydir ma’noga egami?
- Ha. Terma jamoada shu raqam ostida o‘ynardim. «Liverpul» menga o‘z o‘yinim lahzalaridan tayyorlangan videolavha bordi. Unda jumladan, «Fiorentina» va «Yuventus»da 14-raqamli formada urgan gollarim aks ettirilgan. Shu tariqa raqamim taqdir tomonidan belgilab qo‘yilganini o‘yladim va «14»ni oldim.
- Otangiz Yevro-96da Chexiya terma jamoasi darvozasiga qarshi o‘yinda gol urgandi aynan «Enfild»da...
- U «Enfild»da o‘ynaganini aytmagan, lekin o‘sha goli haqida bilaman. Gap shundaki, otam Yevropa chempionatini esga olishni yoqtirmaydi, chunki men qit’a kubogini yutdim, u esa yo‘q! Aslida otam o‘z gollari haqida gapirib berishni xush ko‘radi, harqalay, mendan ancha ko‘proq urgan. Lekin «Enfild»da urgani haqida umuman gapirmaydi.
- Otangiz «Liverpul»ga o‘tayotganingiz yuzasidan nimadir dedimi?
- Ha, «Liverpul» haqida eshitgach, darhol oq yo‘l tiladi: «Bor! Bu - faoliyating uchun eng yaxshi tanlov».
- Endi o‘zingizni futbolchi sifatida tavsiflab bering...
- O‘ylaymanki, yetarli darajada raqobatbardoshman, doim yanada ko‘prog‘iga intilaman. «Liverpul»ga o‘tishimdan asosiy maqsad ham shu - faoliyatimni rivojlantirish.
- Xo‘sh, yangi jamoangizga qanday yangilik olib kirishingiz mumkin?
- Intensivlik, texnik fazilatlar, individual o‘yin... Shuningdek, gollar va assistlar to‘plashdan umidvorman. Axir hujumkor futbolchidan aynan samaradorlik kutishadi.
- Ayni payt jismoniy tomondan tayyormisiz? Ya’ni o‘yinga nechog‘li tez kirishib ketasiz?
- Murabbiy tarkibga qo‘shishi bilan o‘ynayman. Bu masalada muammo yo‘q.
- Asosiy maqsadingiz...
- G‘alaba qozonish, kuboklar yutish. Mashg‘ulotlar bazasiga kirgach, ko‘zlarim klub sovrinlariga tushdi va o‘zimga so‘z berdim: «Yaqin kelajakda shu kuboklardan ba’zilarini yutishim shart».
- Nihoyat, muxlislarga nima deysiz?
- «Enfild»da ko‘rishguncha va You`ll Never Walk Alone («Hech qachon yolg‘iz qolmaysan»)!
MUHAMMADXON tayyorladi
