Superliganing 20-turi doirasidagi «Dinamo» — «Surxon» (3:0) uchrashuvidan keyin mezbonlar bosh murabbiyi Vadim Abramov matbuot anjumanida jurnalistlar savollariga javob qaytardi.

— Bugungi o‘yinni ikkiga bo‘lish mumkin – qizil kartochkagacha va undan keyingi qismga. Ochig‘ini aytsam, raqib o‘yinchisi qo‘polligi uchun chetlatilganidan keyin biroz xavotirlandim ham. Sababi biz ikki marta raqibdan son jihatdan ko‘pchilikda o‘ynab, ochko yo‘qotib qo‘ygandik. «Surxon» jamoasi ochiq futbol o‘ynadi, birinchi golni urib olganimizdan so‘ng bo‘sh hududlar paydo bo‘la boshladi.

— Kojo bugun yaxshi o‘ynadi, ammo gol ura olmadi, shuningdek o‘yin davomida sariq kartochka oldi. Bu borada fikringiz qanday?
— U harakat qildi, ammo bu – futbol. Afsuski, bugun Kojodagi kartochkalar soni 4 taga yetdi va endi u «Paxtakor»ga qarshi o‘ynay olmaydi.

— Anvarjon Hojimirzayev Superligadagi 9-golini urdi. U chempionatda to‘purarlar jadvalida yetakchilar qatorida bo‘lgan mahalliy futbolchi. U milliy jamoaga munosib emasmi?
— Bu savol menga emas. Buni milliy jamoa bosh murabbiyiga berilsa, to‘g‘ri bo‘lardi. U chindanam ajoyib o‘yinlar namoyish etayapti.

— MTJ sobiq bosh murabbiyi sifatida shaxsiy fikringizni aytingchi, Hojimirzayev milliy jamoa darajasidagi futbolchimi?
— Albatta, bunga shubham yo‘q. Uning hozirgi darajasi milliy jamoa talabiga javob beradi.

— Xislat Xalilov ketma-ket chiroyli gollarni kiritmoqda. Uning o‘yini haqida fikringiz?
— Xislat Xalilov milliy jamoaga nomzod futbolchi. U o‘yinlar davomida kutilmagan zarbalarni yo‘llaydi va darvozani ishg‘ol qiladi. Bugun ham chiroyli gol kiritdi. U biroz dangasaroq yigit, hali o‘z imkoniyatini yarmini ham ishga solgani yo‘q. O‘z ustidan tinim bilmay ishlasa, yanada o‘sadi. Biz undan ko‘prog‘ini kutyapmiz.

— Kojo o‘yindan keyin xursand emasdek ko‘rindi, bu gol ura olmagani bilan bog‘liqmi?
— Hujumchi uchun gol urishga ko‘proq harakat qilish normal holat, bu faqatgina gol ura olmagani uchun emas, sariq kartochka uchun ham xafa bo‘lishi mumkin. Chunki keyingi o‘yinini o‘tkazib yuboradi.

— Jamoaning eng yaxshi o‘yinchisi sifatida kimni tanlagan bo‘lardingiz?
— «Dinamo» jamoasini.

— Keyingi o‘yinlarda «Paxtakor» va «Navbahor»ga qarshi o‘yinlar kutib turibdi...
— Bizni qiziqarli o‘yinlar kutib turibdi.