"Palmeyras"ning 17 yoshli futbolchisi Estevao Villian Krishtianu Ronaldu va Lionel Messi haqidagi savolga javob berdi.
Kelasi yozda "Chelsi"ga o‘tadigan braziliyalik vunderkind avvalroq argentinalik superyulduzning o‘yinlaridan ilhomlanganini tan olgandi.
"Men Messining futbol uchun qilgan barcha ishlari, o‘yini va maydon tashqarisidagi xatti-harakatlari uchun unga muxlislik qilaman. Qolaversa, men ham u kabi chap oyoqman.
Ba’zilar iste’dod bilan tug‘iladi, boshqalari ko‘p mehnat qilishlari kerak. Messi va Ronaldu yaxshi misol. Messi iste’dodli, Ronaldu esa mehnat mahsuli. Men iste’dod va mehnatning kombinasiyasi bo‘lishni xohlayman.
Zamonaviy futbolda o‘zingni ishingga to‘liq bag‘ishlashing kerak - rejimga rioya qilish, ko‘p mashq qilish, o‘zingga g‘amxo‘rlik qilish. Siz ko‘p narsani qurbon qilishingiz kerak. Fidoyiliksiz uzoqqa borolmaysiz", - deya Estevao so‘zlarini keltiradi jurnalist Ben Jeykobs.
