Elit Chempionlar Ligasi 3-turida "Paxtakor" 21 oktyabr kuni Iroqning Karbala shahrida "Ash-SHorta" bilan bellashadi.

Ushbu klub 7 bor Iroq chempioniga aylangan. So‘nggi 3 mavsumda bu jamoa ketma-ket Iroq chempionatida g‘oliblikni qo‘lga kiritgan. Hozirda "Shorta"ni mahalliy murabbiy Ahmad Salah boshqarib kelmoqda. Chempionlar Ligasida bu mavsum "An-Nasr" (1:1) va "Al-Hilol" (0:5) bilan o‘yinlar o‘tkazdi.

"Sherlar" Osiyo klublar musobaqalarida Iroq jamoalariga qarshi 8 o‘yinda maydonga tushishgan.

2003 yil "At-Talaba" bilan Toshkentda o‘tgan uchrashuvda 3:0 hisobidagi g‘alaba qayd etilgan. 2005 yil "Zavra" bilan guruh bosqichida kechgan bellashuvlarda iroqliklar muvaffaqiyatga erishishgan. O‘yinlarda 2:1 va 1:0 hisobi kuzatilgan. 2008 yil esa "Arbil"ga qarshi guruh bosqichidagi bahslarda "Paxtakor" ustunroq ekanini ko‘rsatgan. Toshkentda 2:0, safarda 5:1 hisobida g‘alabalar qo‘lga kiritilgan. 2019 yil aynan "Eyr-Fors"ga qarshi Toshkentdagi pley-off o‘yinida jamoamiz 2:1 hisobida zafar quchgan. 2021 yil "Al-Quva" bilan bahslarda 0:0 hamda 1:0 natijalari qayd etilgan.

Umumiy 8 o‘yinda 5 g‘alaba, 1 durang va 2 mag‘lubiyat qayd etilib, Iroq klublari darvozasiga 14 gol urilgan va 5 to‘p o‘tkazib yuborilgan.

"Ash-SHorta" va "Paxtakor" jamoalari o‘rtasidagi o‘yin 21 oktyabr kuni Toshkent vaqti bilan soat 21:00da Karbala Xalqaro stadionida boshlanadi.