Kecha Abu-Dabidagi turnirda avstraliyalik sobiq chempion Robert Uittakerni birinchi raundning o‘zida mag‘lub etgan Xamzat Chimayev rejalari bilan o‘rtoqlashdi.
Chechenistonlik aralash yakkakurash ustasi navbatdagi raqiblari sifatida kimlarni ko‘rayotganini ma’lum qildi.
"Men istalgan raqibimni teykdaunga tushirib mag‘lub eta olaman. Bu jangim uchun rejam ham aslida shunday edi.
Jangdan keyingi matbuot anjumanida Robert jag‘ini qanday holatga kelib qolganini ko‘rsatdi. Men bunday qilishni istamagandim.
Lekin nachora, ishimiz shunday. Shu yo‘l bilan oila boqamiz. Endigi rejalarimga to‘xtaladigan bo‘lsam, o‘rta vaznda amaldagi UFC chempioni Drikus Dyu Plessi bilan jang qilishga tayyorman. Shuningdek, vaznning sobiq chempionlari Shon Striklend va Israel Adesanya bilan ham to‘qnash kelish istagidaman.
Keyingisi kim bo‘lishining ahamiyati ham yo‘q. Men kamar uchun ovga chiqqan ovchiman", - dedi Borz.
