Superligada 23-tur yakunlandi. Turning so‘nggi qarama-qarshiligi Olmaliqda kechdi. Unda OKMK jamoasi «Metallurg»ga qarshi bahs olib bordi va 1:1 hisobida durang o‘ynadi. Bellashuvdan so‘ng jamoa bosh murabbiyi Mirjalol Qosimov matbuot anjumanida ishtirok etdi.

— Chempionat yakuniga qancha kam vaqt qolayotgani sari o‘yinlar shunchalar og‘irlashib ketmoqda. Bugun natijadan ham, o‘yindan ham qoniqqanim yo‘q. Vaqt kam qolgani sari, asabiylashish ortib bormoqda. Hammasini birinchi bo‘limda hal qilsak bo‘lar edi. Darvozaga bir necha marotaba yaqinlashdik. Bir metrdan bo‘sh qolgan darvozaga gol kirita olmadik. Qilingan harakat gol bo‘lmasa, bu 0 ga teng. Ikkinchi o‘rin uchun kurashayogan paytimizda, bu natija yaxshi emas. Endi yana ham asabiylashishga to‘g‘ri keladi. Ortimizdan kelayotganlar yaqinlashib qoldi. Derbi o‘zi hech qachon oson o‘yin bo‘lmagan. Vaziyatdan chiqishimiz kerak.

— Kumush medal uchun imkoniyat qay darajada?

— O‘zimizni o‘zimiz murakkab vaziyatga tushirib qo‘ydik. Jizzaxda ham yomon o‘ynamagan edik, ammo oxirida standartdan o‘tkazdik. Bugun ham, Farg‘ona klubi bilan ham yaxshi o‘ynadik, ammo vaziyatdan foydalana olmadik. Yakunda intriga saqlanib qolindi. Oxirigacha kurashamiz. Nima bo‘lgan taqdirda ham kurashamiz. Shu o‘rinda, konchilarimizni kombinatning 75 yilligi bilan tabriklaymiz. Keyingi o‘yinlarda yaxshi natijalar bilan ularni xursand qilishga xarakat qilamiz.