"Liverpul" bosh murabbiyi Arne Slot "mersisaydliklar" klubida ishlash unga osonmi, degan savolga javob berdi. Niderlandiyalik mutaxassisning so‘zlariga ko‘ra, ijobiy natijalarga qaramay, u o‘z ishini oson deya olmaydi.

"Yo‘q, yo‘q, umuman oson emas. Agar siz faqat natijalarga qarasangiz, bu mumkin, lekin o‘tgan shanba kuni ham biz juda qiyin damlarni boshdan kechirdik - biz "Brayton"ga 0:1 hisobida yutqazdik va yaxshi natijaga erishish uchun bor kuchimizni ishga solishga majbur bo‘ldik. Biz har doimgidek chegaragacha ishlashimiz kerak edi. Agar biz g‘alaba qozonishni istasak, buni qilishning boshqa yo‘li yo‘q. Har qanday holatda ham oson bo‘lmaydi. Ammo g‘alaba qozonsak, hammasi ajoyib, chunki biz aynan shu narsani xohlaymiz", - dedi Slot "Liverpul" rasmiy saytiga.

Bir kun avval, 5 noyabr kuni “Liverpul” Chempionlar ligasi umumiy bosqichi 4-tur uchrashuvida “Bayer”ni mag‘lub etdi (4:0). Turnir jadvalida to‘rt tur natijalariga ko‘ra, “Liverpul” 12 ochko bilan birinchi o‘rinni egallab turibdi.