Superliganing 24-turida "Metallurg" Toshkent shahrida "Bunyodkor" mehmoni bo‘ladi. Mazkur jamoalar shu kunga qadar o‘zaro 37 marotaba to‘qnash kelishgan. “Qaldirg‘ochlar” 26 ta o‘yinda g‘alaba qozongan. 4 ta o‘yinda “Metallurg” zafar quchgan. 7 ta uchrashuvda esa durang qayd etilgan. To‘plar nisbati: 66:28.
Ushbu jamoalarning “Bunyodkor” maydonida o‘tgan uchrashuvlarida mezbonlar to‘liq ustunlikka ega bo‘lishgan. “Metallurg” raqibini 2007 yilda – ilk safar uchrashuvida mag‘lubiyatga uchratgan. Yana 2 ta o‘yinda durang o‘ynagan. Qolgan barcha uchrashuvlar “qaldirg‘ochlar” foydasiga yozilgan. Kiritilgan va o‘tkazib yuborilgan to‘plar farqi – 36:11.
Toshkentda bo‘lib o‘tgan so‘nggi beshta uchrashuv:
23.11.2023 «Bunyodkor» - «Metallurg» 1:0
10.05.2022 «Bunyodkor» - «Metallurg» 1:1
13.08.2021 «Bunyodkor» - «Metallurg» 2:0
17.08.2020 «Bunyodkor» - «Metallurg» 2:0
18.08.2019 «Bunyodkor» - «Metallurg» 1:0
“Bunyodkor” haqida
“Bunyodkor” klubiga asos solinganiga 19 yil bo‘ldi. Jamoa birinchi yiliyoq kuchlilar safiga yo‘llanma olgan. 2007 yildan buyon elitada o‘ynab kelayotgan “qaldirg‘ochlar” 5 marta O‘zbekiston chempioni, 2 marta vise-chempion, 2 marta bronza medali sovrindori, 4 marta O‘zbekiston kubogi sohibi, 1 marta O‘zbekiston Superkubogi sohibi bo‘ldi.
“Qaldirg‘ochlar”ning uy stadioni mamlakatimizdagi eng muhtasham futbol majmuasi – “Bunyodkor” stadioni sanaladi. 2012 yilning 28 sentyabr sanasida qurib, foydalanishga topshirilgan, “Bunyodkor” va O‘zbekiston milliy terma jamoasi uy stadioni hisoblanuvchi mazkur maskan o‘z bag‘riga 34000 tomoshabinni sig‘diradi.
“Bunyodkor” bugungacha oliy liga bahslarida 495 ta uchrashuv o‘tkazgan. Shulardan 292 tasida g‘alaba qozongan, 107 tasida durang o‘ynagan, 96 tasida mag‘lubiyatga uchragan. Kiritilgan va o‘tkazib yuborilgan to‘plar farqi – 851:420. Jamoaning kuchlilar safidagi eng yirik g‘alabasi – 7:0 (“Sho‘rtan”, 2008 yil), eng yirik mag‘lubiyati – 0:5 (“Paxtakor”, 2020 yil).
