Butunjahon boks assosiasiyasi (WBA) o‘zbekistonlik bokschi Shahram G‘iyosov ishtirokidagi chempionlik jangiga promouterlik savdosini e’lon qilgan edi.

Bir oy muddat ichida bokschilar jamoasi kelishuvga erisha olmaganidan keyin 8-noyabr, ya’ni bugun promouterlar o‘rtasida kimoshdi savdosi o‘tkazilishi kerak edi. Ammo jamoalar taklifiga ko‘ra, jarayon 19 noyabr sanasiga ko‘chirildi. Bu haqida WBA ma’lum qildi.

Avvalroq, mazkur jang O‘zbekistonda o‘tkazilishi mumkinligi haqida xabar berilgandi.

Ma’lumot uchun, G‘iyosov so‘nggi jangida meksikalik Migel Parra (22-4-1)ni mag‘lubiyatga uchratgan edi. To‘liq 10 raund davom etgan jangda hakamlarning ikki nafari o‘zbekistonlik bokschi g‘alabasini, bir nafari Parraning g‘alaba qozonganini qayd etgandi.

G‘iyosov bugungacha 16 ta jang o‘tkazgan va barchasida g‘alaba qozongan.

Litvalik Eymantas Stanionis professional boksda 15 ta jang o‘tkazib, barchasida g‘alaba qozongan. Janglarining 9 tasini muddatidan avval yakunlagan.