"Real Madrid" - transfer bozorining asosiy figuralaridan biri. Florentino Peres tarkibni yulduz ijrochilar bilan kuchaytirishga kelganda hech qanday mablag‘ni ayamaydi. Biroq, mavsum boshlanishi qiyin bo‘lganligi sababli, klub yo‘nalishni o‘zgartirishi mumkinligi haqida gap tarqala boshladi. Aniqrog‘i, o‘z uyida yetishgan ispaniyalik futbolchilarga ko‘proq e’tibor qaratish.

Relevo nashri xabariga ko‘ra, madridliklar milliy futbol bozori monitoringini kuchaytirmoqchi va xususan, Ispaniya terma jamoasi futbolchilarini kuchaytirish imkoniyatlarini o‘rganmoqchi.

"Real Madrid"ning sharafini an’anaviy tarzda ko‘plab iqtidorli ispanlar himoya qilishdi, so‘nggi yillarda - Nacho, Xoselu, Asensio, Odriosola, Migel Gutyerres, Mayoral, Serxio Ramos... Ro‘yxat uzun. Hozirgi tarkibda ispan futbol maktabini faqat Karvaxal, Valexo, Lukas Vaskes, Fran Garsiya va Malagada tug‘ilgan, biroq Marokash terma jamoasida o‘ynaydigan Braim Dias namoyon etadi. Qolaversa, qishki transfer mavsumida bu futbolchilarning bir qismi Madridni tark etishi kutilmoqda.

Bu tendensiya "Real Madrid"ning Ispaniya terma jamoasidagi yetakchi rolini yo‘qotishiga olib keldi. Noyabrdagi Millatlar ligasi o‘yinlari uchun Luis de la Fuente tomonidan terma jamoaga chaqirilganlar orasida "Real Madrid"ning birorta futbolchisi(!) ko‘rinmadi. Uzoq vaqt davomida Karvaxal bir o‘zi sharafli vazifani bajardi, ammo himoyachi tizzasidan jiddiy jarohat olib, uzoq muddatga safdan chiqdi.

Endi Ispaniya o‘zining Yevropa taxtiga qaytganidan so‘ng, Olimpiya oltinlari va U-19 terma jamoasidan tashqari, Valdebebas iqtidorli ispanlarni qo‘lga kiritish amaliyotiga qaytmoqchi. Biroq, ko‘p o‘yinchilar mavjud emas, deya manba xulosa qilmoqda.