OAVda U-21 jamoalari ishtirokidagi o‘yinlar 2025 yildan boshlab asosiy tarkibnikidan bir kun avval bo‘lib o‘tishi mumkinligi to‘g‘risida xabar e’lon qilingach, "So‘g‘diyona" bosh murabbiyi Ivan Boshkovich Liga bilan bog‘langan va mazkur masalada o‘z pozisiyasini bildirgan.
"Yosh va iqtidorli futbolchilarga yetarlicha o‘yin amaliyotini berishni istaydigan mutaxassis uchun U-21 jamoasi asosiy tarkibdan keyin o‘ynagani ma’qul. Biz bu yo‘nalishda yetarlicha ish olib bordik, deb o‘ylayman. Agar U-21 jamoasi asosiy tarkibdan bir kun avval o‘ynaganida edi, katta ehtimol bilan qator yosh futbolchilarni ertangi uchrashuvga asrashga harakat qilgan bo‘lardik. Bu bilan ular na yoshlar jamoasida yetarlicha o‘yin amaliyotiga ega bo‘ladi va na ertasiga asosiyda ko‘p o‘ynashi kafolatlanadi. Chunki asosiy uchrashuvda nimalar bo‘lib ketishini oldindan aytib bo‘lmaydi. Shuning uchun ham biz ko‘proq e’tiborni asosiy bellashuvga qaratdik va ertasi kuni kam o‘yin amaliyotiga ega bo‘lganlarni qo‘rqmasdan U-21 jamoasi safida maydonga tushishini ta’minladik", — degan Boshkovich.
Ma’lumot uchun, Ivan Boshkovich U-21 jamoalari ishtirokidagi uchrashuvlarni ham diqqat bilan kuzatib boradigan mutaxassislar sirasiga kiradi.
