ОАВда U-21 жамоалари иштирокидаги ўйинлар 2025 йилдан бошлаб асосий таркибникидан бир кун аввал бўлиб ўтиши мумкинлиги тўғрисида хабар эълон қилингач, "Сўғдиёна" бош мураббийи Иван Бошкович Лига билан боғланган ва мазкур масалада ўз позициясини билдирган.

"Ёш ва иқтидорли футболчиларга етарлича ўйин амалиётини беришни истайдиган мутахассис учун U-21 жамоаси асосий таркибдан кейин ўйнагани маъқул. Биз бу йўналишда етарлича иш олиб бордик, деб ўйлайман. Агар U-21 жамоаси асосий таркибдан бир кун аввал ўйнаганида эди, катта эҳтимол билан қатор ёш футболчиларни эртанги учрашувга асрашга ҳаракат қилган бўлардик. Бу билан улар на ёшлар жамоасида етарлича ўйин амалиётига эга бўлади ва на эртасига асосийда кўп ўйнаши кафолатланади. Чунки асосий учрашувда нималар бўлиб кетишини олдиндан айтиб бўлмайди. Шунинг учун ҳам биз кўпроқ эътиборни асосий беллашувга қаратдик ва эртаси куни кам ўйин амалиётига эга бўлганларни қўрқмасдан U-21 жамоаси сафида майдонга тушишини таъминладик", — деган Бошкович.

Маълумот учун, Иван Бошкович U-21 жамоалари иштирокидаги учрашувларни ҳам диққат билан кузатиб борадиган мутахассислар сирасига киради.