Toshkentda Xalqaro qilichbozlik federasiyasining navbatdagi Kongressi muvaffaqiyatli o‘tkazildi.
Ma’lum qilganimizdek, unda hamyurtimiz Alisher Usmonov yana bir bor ushbu tashkilot rahbari etib saylandi.
Tadbir davomida yana bir qator e’tiborli jarayonlar ham bo‘lib o‘tdi. Jumladan, O‘zbekiston qilichbozlik federasiyasi Bosh kotibi Gulnora Saidova Xalqaro qilichbozlik federasiyasi Ijroiya qo‘mitasi a’zolari orasidan joy oldi.
Yana bir ahamiyatli jihati, poytaxtimiz 2027-yil kattalar o‘rtasidagi jahon chempionatini qabul qiladigan bo‘ldi. Rejaga ko‘ra, musobaqa 20-28-iyul kunlari Toshkentda bo‘lib o‘tadi.
Shuningdek, tadbirda yil yakunlariga bag‘ishlangan taqdirlash marosimi ham bo‘lib o‘tdi. Unda yoshlar o‘rtasida jahon reytingini peshqadam sifatida yakunlagan sablyachimiz Fernanda Errera ham mukofotlandi.
