Los-Anjeles-2028: Futbolchilarimizdan yana bir yo‘llanma kutamiz
Futbol bo‘yicha O‘zbekiston olimpiya terma jamoasi Parij-2024 lisenziyalarini qo‘lga kiritib, delegasiyamiz tarkibida 4-yillikning eng nufuzli musobaqasiga birinchi bor o‘yin sport turlaridan yo‘llanma olgan jamoaga aylandi. Bugun kunning ikkinchi yarmida futbolchilarimizning Los-Anjeles-2028 yozgi Olimpiya o‘yinlariga ham yo‘llanma olish imkoniyatlari va buning uchun ishlab chiqilgan reja muhokama markazida bo‘ldi.
O‘zbekiston futbol assosiasiyasining birinchi vise-prezidenti Ravshan Irmatov hozirda barcha terma jamoalar shakllantirilib, ularga malakali mutaxassislar biriktirilgani, yoshlar terma jamoalari uchun mahalliy va xalqaro o‘quv-mashg‘ulot yig‘inlari tashkil etilayotgani haqida ma’lumot berdi. Shuningdek, Ravshan Sayfuddinovich assosiasiya moddiy-texnik bazasini yanada yaxshilash maqsadida Toshkent viloyatida barcha qulayliklarga ega terma jamoalar markazi barpo etilayotgani, uning to‘liq imkoniyatidan foydalangan holda futbolchilarimiz har qanday musobaqalarga puxta tayyorgarlik ko‘rishlari mumkinligini qo‘shimcha qildi.
Parij-2024 saralashida qizlarimiz ham Olimpiada yo‘llanmalariga juda yaqin kelishgan edi. Biroq so‘nggi bosqichda dunyoning kuchli jamoalaridan biriga imkoniyat boy berildi. Suhbatda yo‘l qo‘yilgan xatolardan xulosa chiqargan holda yangi siklga tayyorgarlik ko‘rish haqida so‘z bordi.
Uchrashuv davomida milliy terma jamoamizning jahon chempionatiga chiqish imkoniyatlari haqida ham to‘xtalib, bu borada jamoaga barcha zarur sharoitlarni yaratish borasida tavsiyalar berib o‘tildi. Qolaversa, viloyatlardagi infratuzilmalarni yaxshilash, yoshlar o‘rtasidagi turli musobaqalar tashkil etish orqali seleksiya ishlariga ahamiyat qaratish borasida fikr almashildi.
Har bir yig‘ilishda bo‘lgani kabi bu gal ham O‘zbekiston delegasiyasini Los-Anjeles-2028 yozgi Olimpiya o‘yinlariga tayyorlash bo‘yicha ishlab chiqiladigan Prezident qarori loyihasiga takliflar belgilab olindi.
