Madridning «Real» klubi chap qanot himoyachisi Ferlan Mendi «Atalanta»ga qarshi bo‘lib o‘tadigan Chempionlar ligasi o‘yinida jamoasiga yordam bermaydi.

Shanba kuni «Jirona»ga qarshi kechgan va «Los Blankos»ning 3:0 hisobidagi g‘alabasi bilan yakunlangan La Liga o‘yinining 81-daqiqasida fransiyalik futbolchi almashtirildi. Jurnalist Fabrisio Romanoning yozishicha, 29 yoshli futbolchi mushaklaridan jarohat olgan va Chempionlar ligasi doirasidagi «Atalanta» bilan o‘yingacha vaqtida tiklanishga ulgurmaydi. Uchrashuv seshanba kuni Bergamoda bo‘lib o‘tadi, start hushtagi Toshkent vaqti bilan 01:00 da yangraydi.

Ferlan Mendi joriy mavsumda Karlo Anchelotti jamoasida 17 ta o‘yinda qatnashib, birorta golda ishtirok etmadi.