"Liverpul" yarim himoyachisi Aleksis Makalister Muhammad Saloh, Trent Aleksandr-Arnold va Virjil van Deyk "mersisaydliklar" klubi bilan yangi shartnomalar imzolashiga umid bildirdi.
"Umid qilamanki, Saloh kelasi yili "Liverpul"da qolishi mumkin. Muzokaralar muvaffaqiyatli o‘tishini istayman. U bu yerda baxtli va klubning afsonasi.
Agar u shu yerda faoliyatini yakunlasa ideal bo‘lardi, lekin bu juda shaxsiy qarorlar va bu ham klubga, ularning tahliliga va qaroriga bog‘liq.
Ha, umid qilamanki, Trent va Virjil ham Saloh kabi bizda o‘ynashda davom etishadi.
Masalan, Aleksandr-Arnold juda muhim, chunki biz "Manchester Siti"ga qarshi o‘yinda jarohatdan qaytganida ko‘rdik. Uning mahorati juda katta.
U himoyadagi o‘yinlari uchun tanqidga uchragan, ammo men u himoyada ham, hujumda ham o‘zgarishlar qila olishiga shubha qilmayman.
Bundan tashqari, u kuchli va tezkor, bu unga hujum va himoya o‘rtasidagi muvozanatni topish imkonini beradi. Saloh kabi u ham muzokaralar olib bormoqda va umid qilamanki, u jamoamizda o‘ynashda davom etadi", - dedi Makallister Diario AS nashriga.
