Sami Xedira o‘z davrining "El Klassiko"lari tarixdagi eng yaxshi o‘yin bo‘lganini aytdi.
Nemis futbolchisi 2010 yildan 2015 yilgacha "Real"da o‘ynagan.
- Faoliyatingiz haqida gapirganda, tarixdagi eng yaxshi o‘yinlarda qatnashganingizni aytasizmi?
- Ha, aytaman. "Real Madrid" va "Barselona" o‘rtasidagi bu o‘yinlar tarixdagi eng yaxshi o‘yin hisoblanadi. Albatta, men o‘zim ham ularda qatnashganim uchun buni aytyapman. Ammo ko‘pchilik muxlislar xuddi shunday deyishadi.
Bu Mourinyo Gvardiolaga qarshi, Krishtianu Messiga qarshi, poytaxt Kataloniyaga qarshi... Bular maksimal shiddatli o‘yinlar, juda yuqori darajadagi o‘yinlar edi. Bu shiddatli futbolga boy qiziqarli uchrashuvlar edi. Qilgan ishimiz esa tahsinga loyiq, chunki biz 2010 yilda ish boshlaganimizda “Barselona” bizdan ustun edi, biroq bir-ikki yildan so‘ng biz farqni yo‘qotdik.
"Barselona" ko‘proq texnik edi, ha, lekin bizda mentalitet va taktik intizom bor edi... Biz maydonda jangchilar edik va har bir o‘yinda o‘zimizni Rim gladiatorlaridek his qilardik. Xabi Alonso, O‘zil, Krishtianu Ronaldu kabi sifatli o‘yinchilar bilan... Bu uch o‘ziga xos yil edi va ko‘plab muxlislar ularning qaytishini xohlashdi. Hatto Germaniyada ham bu haqda menga aytishadi.
- Ushbu o‘yinlarda kim peshqadam bo‘ldi?
- Kasilyas sardor edi, lekin Serxio Ramos yetakchi edi, chunki unda ispan qoni va "Real Madrid" DNKsi bor edi. Ammo bu o‘yinlarga doim tayyor bo‘lgan va barchani olg‘a intilishga majbur qilgan Krishtianu Ronaldu ham borligini unutmang.
U sizning qo‘lingizni ushlab, sizga eng yaxshi tomonlaringizni ko‘rsatishga yordam beradigan narsalarni ayta boshlardi. "Kel, Sami, tajovuzkor bo‘l. Mesut, sehringni ko‘rsat. Di Mariya, to‘pni olib, ishonch bilan o‘yna..." U barchamizni bu o‘yinlarga ruhan tayyorladi, motivator edi. Keyin esa bu o‘yinlarda daho bo‘lgan Mourinyo bor edi. U ularga dahshatli tarzda tayyorlanardi!
Va, albatta, asosiy vazifa Messini to‘xtatish edi. Lekin bu faqat Mourinyoning emas, umumiy vazifa edi. Bularning barchasi o‘yinlar oldidan aql bovar qilmaydigan muhit yaratdi. Biz 100 foiz bor kuchimizni berishimiz kerakligini bilardik. Ammo Arbeloa kabi qo‘lidan kelganicha harakat qilgan boshqa o‘yinchilar ham bor edi", - dedi "Real"ning sobiq yarim himoyachisi.
