Madridning "Real" klubi hujumchisi Vinisius Junior diskvalifikasiya tufayli jamoaga keyingi tur o‘yinida yordam bermaydi.
Braziliyalik futbolchi shanba kuni "Rayo Valyekano"ga qarshi o‘yinning 63-daqiqasida zaxiradan maydonga tushdi va 74-daqiqada sariq kartochka oldi. Bu forvardning joriy La Ligadagi beshinchi ogohlantirishidir, ya’ni u kelasi yakshanba, 22 dekabr kuni bo‘lib o‘tadigan "Sevilya"ga qarshi liga o‘yinini o‘tkazib yuboradi.
La Liganing navbatdagi turi o‘yini oldidan "qaymoqranglilar" qit’alararo kubok finalida Meksikaning "Pachuka" jamoasi bilan to‘qnash kelishadi. Ushbu o‘yin chorshanba kuni bo‘lib o‘tadi.
