«Real Madrid» bosh murabbiyi Karlo Anchelotti sariq kartochkalari to‘planib qolgani uchun Ispaniya Primerasining 18-turida «Sevilya»ga qarshi o‘yinni (22 dekabr) o‘tkazib yuboradigan jamoa vingeri Vinisius Juniorga qo‘shimcha dam beradi. Bu haqda «Relevo» xabar bermoqda.

Manbaga ko‘ra, italiyalik mutaxassis o‘yin kuni Vinicius jamoa bilan birga bo‘lishini talab qilmayapti. Boz ustiga, Anchelotti braziliyalik futbolchiga kecha, 20 dekabr kuni bo‘lib o‘tgan mashg‘ulotni o‘tkazib yuborishga ruxsat berdi.

Vinicius ta’til uchun Mayamiga borishi va 30 dekabr kuni mashg‘ulotlarga qaytishi kutilmoqda. Hujumchining bunday ta’tilini Anchelotti shtabi "Real Madrid"ning qiyin taqvimi bilan bog‘liq holda oldindan o‘ylab topgan.