"Andijon" klubining qishki seleksiyadagi ilk transferiga aylangan Doniyor Abdumannopov yangi mavsumda yana o‘zining qadrdon jamoasi libosida to‘p tepadi.
24 yoshli futbolchi 2024 yilgi mavsumda "Paxtakor" tarkibida Superliga, Kubok va OCHL bahslarida hammasi bo‘lib 24 ta uchrashuvda maydonga tushdi va raqiblar darvozasiga 4 ta gol urib, 4 ta assistni amalga oshirdi.
Doniyor butun diqqat-e’tiborini yana "Andijon"ga qaratgan. Uning maqsadlari katta. "Andijon" matbuot xizmati esa Abdumannopovdan intervyu oldi.
- Doniyor "Andijon" klubiga qaytganingiz bilan tabriklayman. Qachondir qaytishingiz haqida o‘ylarmidingiz?
- Jamoamga qaytganimdan xursandman. "Andijon"ga qaytishga doim tayyor bo‘lganman. Shuning uchun keldim va qaytganimdan xursandman.
- Bungacha "Navbahor" va "Paxtakor" bilan OCHLda to‘p surdingiz. Endi "Andijon" safida ham OCHLda ishtirok etish imkoniyatiga egasiz. "Burgutlar"ni xalqaro maydonda qanday tasavvur qilyapsiz?
- Albatta, jamoa OCHLda birinchi marta ishtirok etadi. O‘ylaymanki, barcha futbolchilar uchun faoliyatida yangi sahifa ochiladi. Imkoniyatlar bo‘ladi, muxlislar bilan ajoyib atmosferada ikki barobar kuch bilan harakat qilamiz. Xudo xohlasa, maksimal darajada kurashamiz.
- Oldin "Andijon"da o‘ynaganingizda yosh, iqtidorli Abdumannopov edingiz, endi esa tajribali Abdumannopov sifatida qaytdingiz. Bu borada nima deya olasiz?
- Ha, ilgari "Andijon"da o‘ynagan paytlarim eng zo‘r davrlar bo‘lgan. Jamoadan ketayotganimda "Bobur arena"da muxlislar bilan xayrlashgandim. Hozir esa yana o‘sha xayrlashgan ishqibozlar oldida to‘p surish juda yoqimli.
- Muxlislar sizdan ko‘p narsa kutishyapti. Ularni xursand qilish uchun qanday gapingiz bor?
- Ularni xursand qilish uchun, sizlar eng zo‘risizlar. Biz esa maydonda xursand qilishga harakat qilamiz.
- "Paxtakor"dagi faoliyatingiz nimasi bilan yodda qoldi, sizda?
- "Paxtakor" o‘z nomi bilan "Paxtakor". Men hali bunday har tomonlama professional klubda ishlamadim. Bir yil ichida o‘zim uchun kerakli ko‘p narsa oldim. Klubdagi hamma muxlislarga rahmat aytaman.
