O‘zbekiston milliy terma jamoasi va “Lans” klubi himoyachisi Abduqodir Husanovni o‘z safiga qo‘shib olmoqchi bo‘lgan jamoalar qatoriga Turkiya klubi ham qo‘shildi.

Xabarlarga ko‘ra, portugaliyalik murabbiy Joze Mourinyo yetakchiligidagi “Fenerbaxche” klubi Husanovni o‘z safida ko‘rishni istamoqda.

Turklar qishki transfer oynasidayoq “Lans”ga Abduqodirning transferi bo‘yicha taklif jo‘natadi.

Avvalroq APLning “Tottenhem”, “Nyukasl”, “Chelsi”, “Vest Hem” va “Lester” klublari futbolchiga qiziqish bildirayotgani haqida xabar berilgandi.

Bundan tashqari, “PSJ” va Madridning “Atletiko” klublari ham himoyachi xizmatlaridan foydalanish niyatida.

Transfermarkt portali futbolchining transfer bahosini 12 million yevroga baholagan.

Abduqodir Husanov Fransiya chempionatida oktyabr oyining “Eng yaxshi yosh futbolchisi” deb topilgandi.

Husanov yosh bo‘lishiga qaramay, O‘zbekiston terma jamoasining ham asosiy tarkibidan muqim joy egalladi. U hozirgacha 18 uchrashuvda milliy jamoa sharafini himoya qildi.