"Barselona" Lamin Yamal Ispaniya Superkubogi uchun vaqtida tuzalib ketishiga ishonmoqda.

Vingeri dekabr kuni "Leganes"ga qarshi o‘yinda (0:1) to‘pig‘idan jarohat olgan va "Atletiko"ga qarshi o‘yinda ishtirok eta olmagandi.

Xabar qilinishicha, Yamal 3-4 haftani o‘tkazib yuborishi mumkin, bu esa uning Ispaniya Superkubogidagi ishtirokini shubha ostiga qo‘ygan.

Marca nashri xabariga ko‘ra, "Barselona" bunga optimizm bilan qaramoqda va 8 yanvar kuni Saudiya Arabistonida bo‘lib o‘tadigan "Atletik"ga qarshi Superkubok yarim final uchrashuvida Yamal o‘z vaqtida tuzalib ketishini kutmoqda.

Futbolchining tiklanish jarayoni yaxshi ketmoqda, bir necha kundan keyin Lamin qolgan futbolchilar bilan mashg‘ulotlarga qaytishi kerak.

Shunga qaramay, klub ehtiyotkorlik bilan harakat qilmoqchi. Yamalni tarkibga qo‘shish yoki qo‘shmaslik bo‘yicha qarorni Xansi Flik qabul qiladi.