Pedru Moreyra va uning murabbiylar shtabi "Paxtakor" a’zolari bilan tanishdilar.
Portugaliyalik mutaxassis Antaliyada jam bo‘lgan futbolchilar bilan yaqindan tanishish maqsadida uchrashuv tashkil qildi.
"Biz bu yerga Sizlar bilan katta ishni bajarish uchun to‘plandik. Imkon qadar "Paxtakor"dagi o‘yinlaringizni ko‘rib, sizlar bilan tanishishga harakat qildim. Qolgan ma’lumotni mashg‘ulot va o‘rtoqlik o‘yinlarida olamiz. Klub raisi Jahongir Abidovichning taklifiga ko‘ra, katta murabbiylar jamoasi bilan Toshkentda ish boshlaydigan bo‘ldik. Mening va do‘stlarimning maqsadi Sizlar bilan yuqori natijalarga erishish. Siz "Paxtakor"siz, bu klubni o‘rganar ekanman, o‘zbek futbolining ustuni ekanligiga amin bo‘ldim. Bunday katta jamoada ishlash biz uchun ham sharaf", - deydi Moreyra.
Xabaringiz bor, jamoamiz negizi saqlab qolindi. Sergeev va Bashar bilan hujum chizig‘imizning sifati oshdi. Bu futbolchilarning bariga ishonch bildirishni aynan yangi murabbiy aytib o‘tgan.
"Agar biz barcha vazifalarni o‘z vaqtida bajaradigan bo‘lsak, ishoning, bizdan kuchlisi bo‘lmaydi. Men bu yerga kelib, Siz o‘rganib qolgan hamma narsani o‘zgartirib yubormayman. Qayerdadir biz Sizlarga, qayerdadir, Siz bizlarga moslashasizlar. Futbol jamoaviy o‘yin, ishimiz ham shunday birgalikda bo‘lishi kerak. Yil oxirida mana shunday kayfiyatda g‘alabalarni tahlil qilish haqida o‘ylashimiz kerak", - deya bosh murabbiy tug‘ilgan kunini nishonlayotgan
Ulug‘bek Hoshimovni tabrikladi.
Delegasiya rahbari, klub raisi o‘rinbosari Dilshod Karimov murabbiyni tanishtirar ekan, quyidagi gaplarni aytib o‘tdi:
- Biz bir tanu, bir jon bo‘lishimiz kerak. Shundagina ahil oila sifatida shakllanamiz. Bu juda muhim. Agar Siz bir-biringizni qo‘llab-quvvatlab, bir oila bo‘ling. Klubimiz raisining Sizlardan talab qiladigan yagona narsasi muxlislarga yoqadigan chiroyli o‘yin ko‘rsatish. Shu yerga "Paxtakor" bilan yetib keldingizmi, demak Siz eng zo‘rlarisiz. Buni maydonda isbotlashingiz qoldi.
