Xalqaro shaxmat federasiyasi tizimidagi shess.com tizimi 2024 yilda shaxmat turnirlarida eng katta mukofot pullarini qo‘lga kiritgan shaxmatchilar ro‘yxatini e’lon qildi.
Keltirilgan ro‘yxatga ko‘ra, 2024 yil klassik shaxmat bo‘yicha jahon chempionligiga erishgan hindistonlik Gukesh Dommaraju 1 million 577 ming 842 dollar, Din Lijen 1 million 183 ming 600 dollar, Magnus Karlsen 639 ming 369 AQSH dollari bilan dunyoning eng daromadli shaxmatchilari sifatida e’tirof etildi.
E’tiborli jahati, hamyurtimiz Nodirbek Abdusattorov ortda qolgan 2024 yilda 132 ming 981 AQSH dollarini qo‘lga kiritgan holda dunyoning eng daromadli o‘n ikkinchi shaxmatchisi sifatida qayd etildi.
Eslatib o‘tamiz, Abdusattorov o‘tgan yilgi 12 ta nufuzli turnirda shuncha mablag‘ni qo‘lga kiritgan.
Shu o‘rinda yana bir gap. Ayni kunlarda birinchi raqamli shaxmatchimiz Nodirbek Abdusattorov joriy yilning 17 yanvar kuni Niderlandiyaning Veyk-an-Zee shahrida boshlanadigan "Tata Steel Chess-2025" musobaqasiga hozirlik ko‘rmoqda.
