«Real» bosh murabbiyi Karlo Anchelotti Ispaniya Superkubogi finalida «Barselona»ga qarshi bo‘lib o‘tadigan o‘yin haqida fikr bildirdi.

— Agar ertaga yutqazsak, mavsum davom etadi. Bu final, va biz yana bir sovringa juda yaqinmiz. Biz pozitiv kayfiyatdamiz, lekin futbolda har narsa sodir bo‘lishi mumkinligini tushunaman, ayniqsa, raqib «Barselona»dek kuchli jamoa bo‘lsa. Shunga qaramay, ertangi final oldidan o‘zimizni ishonchli his qilyapmiz.

Oktyabr oyidagi o‘yin haqida o‘ylashimiz kerak edi, chunki o‘shanda ular bizni mag‘lub etishgan. O‘shanda nimalar sodir bo‘lganini aniq tahlil qildik. «El-klasiko» har doim «El-klasiko», va finalda bosim yanada kuchayadi. «El-klasiko»da sifat jamoaviy muvozanatdan ustun turadi. Shu sababli, so‘nggi «El-klasiko»lar biroz aqlbovar qilmas darajada qiziq bo‘lgan. Ertangi o‘yinda himoya juda muhim: agar siz yaxshi himoya qilsangiz, g‘alaba qozonish imkoniyatingiz yuqori bo‘ladi. Ofsaydlar bilan bog‘liq taktik jihat ham juda muhim ahamiyatga ega, biz buni tahlil qilib, ustida ishladik.

Bu sovrin katta ahamiyatga ega, chunki statistikaga ko‘ra, agar biz Superkubokni yutgan bo‘lsak, o‘sha mavsumda La Liga va Chempionlar Ligasida ham g‘alaba qozonamiz, — dedi Anchelotti.

«Real» – «Barselona» o‘yini 12 yanvardan 13 yanvarga o‘tar kechasi Saudiya Arabistonining Jidda shahrida o‘tkaziladi va Toshkent vaqti bilan soat 00:00 da boshlanadi.