Yangi mavsumga tayyorgarlik ko‘rayotgan OKMK seleksiya ishlarini jadallik bilan davom ettirmoqda. Jamoa qishki transferlar oynasida osiyolik hujumkor yarim himoyachi — Naoaki ni o‘z tarkibiga qo‘shib oldi. 26 yoshli yapon futbolchisi markaziy chiziqlarda har bir pozisiyada o‘zini mukammal namoyon qila olish qobiliyatiga ega.

177 sm bo‘yga ega bo‘lgan Senaga, faoliyati davomida Yaponiya, Chernogoriya va Vengriya chempionatlarida o‘zining yuqori darajadagi o‘yinlari bilan tanilgan. Uning so‘nggi jamoasi "Debresen FK" klubi bo‘lib, o‘tgan mavsumda 34 ta o‘yinda maydonga tushgan. Shu davr mobaynida, ya’ni, Yevropadagi faoliyatida u 9 ta gol urib, 3 bor golli uzatmalarni amalga oshirgan. Endilikda, OKMK va futbolchi o‘rtasida 2 yillik shartnoma imzolandi.

"OKMK rahbariyati, yangi futbolchimizning jamoaga qo‘shadigan salohiyati va yuqori darajadagi professional mahorati orqali klubimizning g‘alabalari va muvaffaqiyatlarini yanada mustahkamlashga, shuningdek, uning kelajakdagi o‘yinlarda jamoa o‘yiniga qo‘shadigan hissasi klub muvaffaqiyatlarini yanada yuksaltirishiga ishonch bildiradi. OKMK ahil oilasiga xush kelibsan, Naoaki Senaga!" - deyiladi "konchilar"ning rasmiy bayonotida.