Янги мавсумга тайёргарлик кўраётган ОКМК селекция ишларини жадаллик билан давом эттирмоқда. Жамоа қишки трансферлар ойнасида осиёлик ҳужумкор ярим ҳимоячи — Наоаки ни ўз таркибига қўшиб олди. 26 ёшли япон футболчиси марказий чизиқларда ҳар бир позицияда ўзини мукаммал намоён қила олиш қобилиятига эга.
177 см бўйга эга бўлган Сенага, фаолияти давомида Япония, Черногория ва Венгрия чемпионатларида ўзининг юқори даражадаги ўйинлари билан танилган. Унинг сўнгги жамоаси "Дебресен ФК" клуби бўлиб, ўтган мавсумда 34 та ўйинда майдонга тушган. Шу давр мобайнида, яъни, Европадаги фаолиятида у 9 та гол уриб, 3 бор голли узатмаларни амалга оширган. Эндиликда, ОКМК ва футболчи ўртасида 2 йиллик шартнома имзоланди.
"ОКМК раҳбарияти, янги футболчимизнинг жамоага қўшадиган салоҳияти ва юқори даражадаги профессионал маҳорати орқали клубимизнинг ғалабалари ва муваффақиятларини янада мустаҳкамлашга, шунингдек, унинг келажакдаги ўйинларда жамоа ўйинига қўшадиган ҳиссаси клуб муваффақиятларини янада юксалтиришига ишонч билдиради. ОКМК аҳил оиласига хуш келибсан, Наоаки Сенага!" - дейилади "кончилар"нинг расмий баёнотида.
