Ayni kunlarda Farhod Nishonov boshqaruvidagi O‘zbekiston U-20 terma jamoasi Dohada Osiyo kubogiga tayyorgarlikni davom ettirmoqda. Xitoy mezbonlik qiladigan musobaqada jamoamiz guruh bosqichida Indoneziya, Yaman va Eron jamoalariga qarshi bahs olib boradi.

O‘FA rahbariyati kecha yoshlar jamoamiz bilan uchrashdi. Unda jamoa oldida turgan ushbu musobaqa haqida fikr bildirilar ekan, O‘zbekiston turnirning amaldagi g‘olibi ekanligi, terma jamoa bu gal ham musobaqada munosib ishtirok etgan holda Jahon chempionatiga yo‘llanmani qo‘lga kiritishi zarurligi ta’kidlandi. Bu borada assosiasiyasi tomonidan barcha sharoitlar tashkil etib berilgani aytildi. Bir jamoa bo‘lib, ahillikda yuqori natija qayd etishlariga ishonch bildirildi.

"Bu kabi musobaqalar siz uchun katta imkoniyatlar eshiklarini ochib, keyingi professional faoliyatingizda ulkan burilish yasashi mumkin. Buni Abduqodir Husanov misolida ham ko‘rishimiz mumkin. U aynan Osiyo kubogidagi yorqin o‘yinlari orqali xorijiy klublar e’tiboriga tushgandi", — dedi Ravshan Irmatov.

O‘z o‘rnida jamoamizning bir qator yetakchi futbolchilari ham fikrlarini bildirib o‘tishdi. Murabbiylar shtabi bilan jamoaning ayni paytdagi holati va tayyorgarlik jarayoni haqida suhbatlashildi. Tibbiy shtabga futbolchilarning sog‘ligi, tiklanishi va vitaminizasiyalash jarayoni, shuningdek, futbolchilarga yuqori darajadagi tibbiy yordam ko‘rsatish amaliyotini davom ettirish ko‘rsatmasi berdi.

Ma’lumot uchun, jamoamiz bugun Dohadagi yig‘inni yakunlab Toshkentga yo‘l oldi. 27 yanvar kuni esa musobaqa oldidan so‘nggi yig‘inni o‘tkazish uchun Xitoyga jo‘nab ketadi.