Ma’lumki, «Andijon» Antaliyada yangi mavsum uchun o‘quv-mashg‘ulot yig‘inini olib bormoqda. Tarkib ham shakllantirilmoqda. Yaqinda iste’dodli yarim himoyachi Damir Temirov bilan shartnoma imzolanganligi xususida rasmiy xabar berib o‘tdik.

O‘tgan yili ikkinchi davrada jamoaga qo‘shilgan futbolchi o‘zidan iliq taassurot qoldirdi. Muxlislar mehrini ham qozondi. O‘shanda u «Dinamo»dan ijaraga kelgandi. Endilikda esa Temirov yangi mavsumda to‘laqonli ravishda «Andijon» futbolchisiga aylandi.

Futbolchi «Burgutlar» bilan birga Antaliyadagi yig‘inda faol ishtirok etmoqda. Klub matbuot xizmati esa mazkur o‘yinchi bilan ayrim masalalarda suhbatlashdi.

— Damir yangi mavsumda siz endi to‘laqonli ravishda «Andijon» a’zosiga aylandingiz. O‘tgan yili ijara hisobida o‘ynagansiz. Bu yil yana «Andijon»ga qaytishingizni asosiy sabablari nima bilan bog‘liq bo‘ldi?

— «Andijon»ga qaytib kelishimni asosiy sababi, bu — murabbiy va albatta klubning o‘z oldiga qo‘ygan maqsadlaridir.

— Jamoa bilan Antaliya yig‘inida qatnashyapsiz. Bu yerdagi mashg‘ulotlar qanday kechyapti va o‘zingizni qanday his qilyapsiz?

— Aytishim joizki, mashg‘ulotlar a’lo darajada va bu yerda o‘zimni juda yaxshi his qilyapman.

— Siz o‘ynaydigan pozisiyada o‘zingiz uchun qaysi futbolchini namuna qilib ko‘rsata olasiz?

— Jamoamda bu — Iskandar Shoyqulov, Yevropada esa albatta Kevin De Bryuyne.

— Bilasiz, «Andijon» ilk bor OCHLda qatnashadi va bunday imkoniyat sizda ham ilk bor amalga oshadi. «Burgutlar»ni ushbu turnirda imkoniyatini qanday baholaysiz?

— O‘z oldimga har doim maksimal vazifa qo‘yaman. Niyatni to‘g‘ri qilsak, Xudo xohlasa chempion bo‘lishimiz ham hech gap emas.

— «Andijon»dagi yarim mavsumlik faoliyatingiz unutilmas bo‘ldi, Kubok qo‘lga kiritildi. Shunday ekan, siz kelganingizda nimani istagandingiz?

— Allohdan qirday so‘rasang, tog‘dek beradi, degani rost ekan. Albatta, ko‘proq o‘yin amaliyotiga ega bo‘lish uchun ham kelgan edim. Hammasi juda ajoyib kechmoqda.

— Antaliyadagi yig‘in juda muhim. Doim yilning shu vaqtida klublarimiz shu yerga kelishadi. Sizga eng ko‘p yoqadigani nima?

— Menga yoqadigan narsa bu — iqlim, maydon va yaxshi sparring-raqiblar.