Xorvatiyalik golkiper Dominik Livakovich «Fenerbaxche»dan «Barselona»ga o‘tdi. Bu ma’lumotni nufuzli insayder Fabrisio Romano e’lon qildi.

Manbaning ma’lumotlariga ko‘ra, 31 yoshli darvozabon «Barselona» bilan shartnoma imzoladi. Futbolchining transferi «ko‘k-anorrangliklar»ga 2 million yevro hamda 2 million yevro miqdoridagi bonuslarga tushdi.

«Barselona» Livakovichni darhol joriy mavsum oxirigacha ijaraga berishni rejalashtirmoqda. U Voysex Shesnining shartnomasi tugaydigan 2027 yilning yozidan boshlab kataloniyaliklarning ikkinchi darvozaboniga aylanishi kutilmoqda.

Livakovich o‘tgan mavsumning birinchi yarmini «Jirona»da, ikkinchi yarmini esa Zagrebning «Dinamo» klubida ijarada o‘tkazdi. Shu bilan birga, u «Fenerbaxche» safida ham bir nechta o‘yin o‘tkazishga ulgurdi. Umuman olganda, golkiper 19 ta uchrashuvda maydonga tushib, 18 ta gol o‘tkazib yubordi va 8 marta o‘z darvozasini "quruq" saqlab qoldi.