Хорватиялик голкипер Доминик Ливакович «Фенербахче»дан «Барселона»га ўтди. Бу маълумотни нуфузли инсайдер Фабрицио Романо эълон қилди.

Манбанинг маълумотларига кўра, 31 ёшли дарвозабон «Барселона» билан шартнома имзолади. Футболчининг трансфери «кўк-аноррангликлар»га 2 миллион евро ҳамда 2 миллион евро миқдоридаги бонусларга тушди.

«Барселона» Ливаковични дарҳол жорий мавсум охиригача ижарага беришни режалаштирмоқда. У Войцех Щеснининг шартномаси тугайдиган 2027 йилнинг ёзидан бошлаб каталонияликларнинг иккинчи дарвозабонига айланиши кутилмоқда.

Ливакович ўтган мавсумнинг биринчи ярмини «Жирона»да, иккинчи ярмини эса Загребнинг «Динамо» клубида ижарада ўтказди. Шу билан бирга, у «Фенербахче» сафида ҳам бир нечта ўйин ўтказишга улгурди. Умуман олганда, голкипер 19 та учрашувда майдонга тушиб, 18 та гол ўтказиб юборди ва 8 марта ўз дарвозасини "қуруқ" сақлаб қолди.